حدث خطأ في هذه الأداة

السبت، 4 يونيو، 2011

تخابيط تخابيط



يعني إيه كوكا كولا زيرو؟
من زمان والكلمة دي بتعصبني ولكن فجأة لقيتها معبرة جدا... .المواقف التالية دي كلها استفزتني  :


يعني إيه كوكا كولا زيرو؟
يعني عشان انا بنت في السعوديه اقول سلام عليكم لراجل في الاسانسير أنا وقريبتي ميردش ولما راجل يخش بعدي ويسلم يرد السلام هو مش برده السلام واجب على كل مسلم ؟

يعني إيه كوكا كولا زيرو؟
يعني أول مانوصل من المطار نلاقي الشرطه بتفتح طابور عشان واحد متوصي عليه من السعودية"أُمّال أه لزمة 25 يناير ؟

يعني إيه كوكا كولا زيرو؟
يعني خبر ينزل في الاهرام ان راجل اعتدي علي شرطي في قسم شرطه و في المصري اليوم تلاقيهم بيقولو ان الشرطي هو اللي قتل الراجل...أمال فين الشفافية؟

يعني إيه كوكا كولا زيرو؟
يعني  لما  تروح تاكل ولما تروح تصلي وكمان لما تركب تاكسيتلاقي الناس كلها بتقول اد ايه الشعب المصري شعب مش متحضر (وانا في السعودية)

يعني إيه كوكا كولا زيرو؟
يعني إيه وانت بتركب الطائرة تلاقي واحد مصري بيتبلطج ومش عايز يسمع كلام الأمن ولما يقوله الأمن يا فندم غلط كده ممنوع يقول له ايه يعني هو أنا فلاح وأول مرة أسافر..السوأل..مال الفلاح ومال الموضوع؟؟؟

يعني إيه كوكا كولا زيرو؟
يعني تلاقي الدين بالنسبة للانسان المظهر البس ايه ومتلبسش ايه وتلاقيه بيرشي موظف عادي...

يعني إيه كوكا كولا زيرو؟
يعني تلاقي واحد يتظاهر ويقولك الليبرالية دول كفره ويطلع في اشاعات علي خلق الله علي أساس إن ده شر وهوالخير...هو مش برضه اطلاق الاشاعات والنميمة غلط  ولا هي مصالح وخلاص؟؟

 يعني إيه كوكا كولا زيرو؟
يعني تلاقي البلد بتولع علي مواطنات غيروا دينهم لأسباب شخصية ولكن الناس بتعاملهم كأنهم رموز دين ودفاع عن عقيدة وفاكس البد بقه تضرب تقلب؟

يعني ايه و يعني ايه و يعني ايه

عزيزي الانسان تصرفاتك غير عقلانية...تبريراتك ليس لها معني...افعالك  ليست  انسانيه
عزيزي الانسان  الذي يدعي التدين ايا كانت اشكاله...`خدها قاعدة الاخلاق والمعاملات اهم من أي حاجة
عزيزي المواطن المصري ! ارجوك لو عايز التغير ابدا بنفسك زهقتني...فالح بس تقول تغير تغير....الفرصة امامك لو سمحت اتغير

                                                                                                                                                            امضاء
                                                                                                                      انسان زهق من تصرفات اخوهالانسان 

الجمعة، 4 فبراير، 2011

تختلف الأراء ولكن لا تختلف القضية

اولا:
ماهي حقوق المواطن البديهيه؟
  • الأكل 
  • الشرب
  • النوم تحت سقف بيت
  • تعليم محترم
  • توفير فرص العمل
  • مجتمع محترم وامن
  • توفير مواصلات محترمه
  • ان تكون الشرطه في خدمه الشعب مش تهزيقه
ما هي الحقائق حول البني ادم المصري؟
  • في مصر 45% من الشعب تحت خط الفقر مما يعني ان الدخل اليومي اقل من دولار في اليوم
  • 12 مليون مصري دون مأوي ولكن نص مليون عيشين في المقابر 
  • لا يقل عن 46% من الاسر المصرية لا تجد الطعام الكافي
  • في مصر أكتر من 39 مليار جنيه دارت حولها أخبار فساد واهدار المال العام
ثانيا:
 أنا سأحاول ان اعرض الاراء السائده ولكن اعتقد انني لن استطيع عرضها في حياد
  • الرأي الأول: حسني مبارك ده زي أبويا لازم نحترمه
  • الرد: الكلام ده المتوقع انه يتقال من عيل في ابتدائي ولكن للاسف S: !  الرأي ده خطأ 100% و ده لأن احنا اللي بننتخبو عشان شايفين إن هو هيعمل اللي في مصلحتنا وأذا قصر في عمله مننتخبوش تاني! ولكن في بلدنا مش ده اللي حاصل ! احنا عندنا انسان متوحش عنده هاجس السلطة مسيطر علي عقله بقاله 30 سنه...مش هقدراقول مع احترامي للناس اللي قالت كده..بصراحه عشان دي اسمها عاطفه وسذاجة وربنا معاه.

  • الرأي الثاني: الرجل ده ليه انجازات كتيرة
  • الرد:أرجع لأول الصفحة هتلاقي حجم الانجازات ولو عايز غيرها هقولهالك! ولو سمحت بس قول لي انجازاته ايه من وجهة نظرك عشان أنا فعلا مش أدره أعرف

  • الرأي الثالث:أنا مش بحبه ولا بشجعه ولكن مجتش علي ال 6 شهور
  • الرد:والله أنا نفسي كنت قربت من اقتنع بعد خطاب الرئيس, قلت خلاص أهو ماشي..ولكن حصل اللي حصل يوم الأربع:
    • ذهب مؤيدين مبارك لمعارضينه في ميدان التحرير 
    • المعارضين كانوا داخلين بحصنه وجمال وسيوف جو كفر مريب ولا كأننا في عصر الجاهليه
    • التجاهل التام من قبل المسئولين لما كان يحدث
    • لم يتم ارسل عناصر الشرطة للفض مابين الطرفين
    • لم يتم اصدار أي نوع من أنواع التصريحات كأن اللي بيحصل ده في اسطنبول مثلا
    • نحط في بالنا ان احمد شفيق قال يوم الثلاثاء ان علي رقبته لو حصل حاجه للمتظهرين في التحرير
  • يوم الخميس:
    • احمد شفيق في مؤتمر صحفي قال انه:
      • هيحاكم أي حد حته لوكان صاحب نفوذ
      • يعتذر عن ماحدث (لا يكفي)
      • مكنش يعرف ان فيه ناس رايحه التحرير ! (لو الكلام ده صح يبقي عيب قوي(
    • عمر سليمان: 
      • لن يترشح الرئيس ولا ابنه للرئاسه في الانتخابات القادمه 
    • حسني مبارك:
      • مش هتنحي خوفا من الفتنة اللي هتحصل والاخوان هما اللي عملوا موضوع البلطجية ده (قد ايه قلبه كبير وبيخاف علي البلد! يا عم سبها وكفايه اللي عملته بلاش تهذي )
  • يوم الجمعه:
    • احمد شفيق:
      • قال انه لا يعتقد ان ممكن يحصل تفويض
      • قال ان الدنيا هترجع طبيعي الناس هتروح الشغل واللي عايز يتظاهر الميدان موجود
    من الواضح ان هذه الحكومه وهذا النظام لا يخلوا من الفساد ومتمكن في تضليل الناس                         وأرباكهم والتلاعب بهم ! هذا نظام فاسد لا يجب ان يأتمنه احد! 

  • الرأي الرابع : ارحل...ارحل
  • الرد: انتوا اللي بداتوها...انتوا اللي ادتونا التغير والأمل ! علشان اللي عملتوه وأنضم ليكوا ناس كتير! انتم أصحاب الثوره! ربنا معاكوا :)

    اخر حاجة هقولها تتعلق بالناس اللي عماله تلوم المتظاهرين علي خراب بيوتهم وانعدام الأمن اللي هما عيشين فيه. ياريت يا جماعه قبل أما نوجه الاتهامات نفتكر ان الناس دي هي أصحاب التغير اللي ممكن يحصلنا و نعرف مين السبب الحقيقي للي احنا فيه وان هو تفرقنا ده هو اللي كان عايزه من الأول! 

                             الحريه لها ثمن............<<ان الله مع الصابرين>>



    الثلاثاء، 25 يناير، 2011

    رسالة الى كل ظالم

    احنا شعب مظلوم
    شعب حقه بقاله ٣٠ سنة مهضوم
    ناس كتير تعبت
    و من الظلم زهقت
    و من الفقر بردت
    و من الجوع شبعت
    كفاية....حراممممممم
    اعلنوا بقى الإنهزام
    انهارده ناس كتير نزلتلكوا
    و عن مطالبها عبرتلكوا
    و اديكوا دلوقتي عرفين
    ان احنا شعب مش هينين
    من ظلمكوا زهقنا
    و من نهبكوا قرفنا
    فوقوا بقى يا بني ادمين
    داحنا كلنا في الدنيا فانين

    انتوا ايه مش خايفين من ربنا؟
    مش عاوزين تساعدوا مصرنا؟
    هذه الرسالة موجهة الى كل مسئول...كل ظالم كان فاكر ان اليوم اللي الناس هتطلع فيه مش هاييجي اهو جه.
    ادينا كلنا منتظرين في اي مظاهرة واقفين....
    انجي حمزه
    25/1/2011

    السبت، 15 يناير، 2011

    احنا الشعب

    قبل اي حاجة عايزاكوا تتخيلوا معايا الموقف ده....
          
       واحد اتكعبل وقع في حفرة غويطه جداً مش هيعرف يطلع منها من غير مساعدة..ولما وقع لقى ان في كذه حد في الحفرة معاه...كل شوية ينزل حبل يفتكر ان الحبل ده فرصته للخروج و ان هو ده الحلم اللي مستنيه بقاله فترة..بس للأاسف يطلع الحبل ده موجه لحد من الناس اللي معاه في الحفره و يرجع تاني مستني الحلم والفرصه ييجوا و ان الحبل المره البعديهة يكون متوجه له
      
       هو ده بالظبط حال الشعب المصري..شعب اتنسى مفيش حد عايز يطلعه من الحفره اللي وقع فيها, يمكن عشان اللي فوق خايف يقع معاه في نفس الحفرة او يمكن خايف من الناس اللي بره اللي رافضه طلوعه للنور خوفاً على حريتهم الشخصية..كل شوية يحصل حاجه في بلد غيرنا نحس ان الحل اللي عندهم هو الحل اللي لازم نستخدمه..و لكن عمره مابيطلع الحل المناسب


    الكلام اللي اتقال امبارح بعد احداث تونس هو اللي خلاني اقرر اكتب الكلام ده..ناس كتير اعدت تقول عقبال مصر و ناس تانية ترد عليهم تقولهم انتوا جهلة و عايزيين تعيشوا في فساد و عدم استقرار..و اختلاف وجهات النظر في الكلام ده عادي و متوقع..و لكن الشئ المثير للإهتمام هو الدافع وراء المناقشات ديه...حاجة الشعب المصري للتغيير اصبحت تلح عليه و بالتالي بقي يشوف الامل في اي احتجاجات او انقلابات من الشعوب الاخرى ضد الظلم الواقع عليهم..



    لو فكرنا في ردود فعل الشعب المصري بعد احداث شغب الجزائر و بعد احداث كنيسة الاسكندرية و كمان احداث تونس ! احنا شعب غلبان مافيش حاجة في ايده غير انه يعبر بصوره او بكتابة ما يشعر به لكن بنخاف نعترض خوفاً من قانون طوارئ اللي بيقيد حركة الشعب المصري و بيخللي مالوش صوت! احنا عندنا طاقة لكن غير موجهة! طبقات كثيرة من الشعب مش راضيها اللي بيحصل و لكن للاسف في كل محاولة لا نجد من يوجه هذه الطاقه الى خطة واضحة


    الحل ايه؟
    انا في رأي ان احنا محتاجين قائد..عنده خطة واضحة ممكن ان يوافق عليها الشعب لحل المشاكل اللي بتواجهها الدولة! و لكن الحل ده في ظل الظروف اللي احنا فيها يعتبر مستحيلاُ  فنرجع و نقول محدش عارف..بس المهم ان احنا نسمع بعض و نفهم ان احنا كلنا في المشكله دي مع بعض و الله مع الصابرين!




    الأربعاء، 12 يناير، 2011

    خُلِقت لأعترِض!!

    انا مش هخاف انا هقول اللي انا عيزاه. يا ناس ياللي على طول بتقول هتهجو من البلد قولولي بسهتسبوها و تروحوا فين؟ هتروحوا لامريكا ولا اوروبا؟ فاكرين هناك هتلاقوا السعادة و الحرية و الغناء؟ ماشي انا معاكوا طبعاً في بعض النقط..بس دائماَ الواحد بيقارن بين المميزات و العيوب فتعالوه نبص لمصر الأول, مصرفيها مشاكل الدنيا مش هعترض من ناحية بطالة و جهل و فقر. و من ناحية تانية مجتمع لازم نقدره عشان بنمارس فيه عادتنا و تقالدنا بحرية, مجتمع نقدر نربي فيه اولادنا و نرسخ جواهم المبادئ المفهومة بالنسبه لنا, ميزة في مجتمعنا انه بغض النظر عن خلافاته تقدر تتعايش معاه ولا بالنسبه لنا للتفتح ولا التطرف و نرسخ جواهم عقيدة و منها يفرقوا ما بين الصح و الغلط اللي مفاهما مهما اختلفت  بين الناس مابتبعدش عن بعضها. 

    و من ناحية اخري لو رحنا لبلد تانية...نفكر الاول هل هو ده اللي هيرضينا؟ هل هنلاقي احسن معاملة؟ طبعاً لأ مع اعترافي بوجود بعض الحالات السعيدة, لو طلعت بره بلدك هتبقى دائماَ دخيل مش صاحب مكان يعني هتلاقي مجتمع غير اللي انت كنت متعود عليه, هتواجه مشاكل لو مكانتش مصائب و انت بتربي عيالك. الكلام ده انا مش بتكهنه بس انا بشاركوا خبرات ناس مرت بالمشاكل دي انا اعرفهم شخصياً.

    من كم شهر كده شاركنا "عبدالله سليمان" انا و اصدقائي مقالة بتتكلم عن طبقة سماها كاتبها ب "الطبقة المستريحة" و صنفها على انها الناس اللي  ربنا مقدرها و بتاكل و بتشرب كويس و بتتعلم تعليم نظيف و الحمد لله طبعاً. و انا اعجبت بهذه المقالة جداً و قررت اني اقسم الطبقة دي الى اربع اقسام, القسم الاول هي الناس اللي عايزه تمشي من البلد و قرفها زي ما كنت بقول في الاول. و ناس تانية اساساً مش فارق معاها خالص المهم ان هي بتاكل و بتشرب و بتلبس "سينيه". القسم التالت بقي هي الناس الفارق معاها بس مش عرفه تبدأ منين و دائماً حسه ان هي متسلسله ونيجي لاخر نوع من الأقسام اللي هي الناس اللي بتحاول تاثر بس للاسف انا خايفه عليهم من الاحباط لانه في ظل الظروف اللي احنا عيشين فيها دي شيطان "مفيش فايده" ممكن يأثر عليها بسهولة.

    اعتراضي يتلخص في سؤال: " الناس دي لو مشيت هتسبها لمين؟" هل هتسبها للحراميه اللي عامالين يسرقوا فيها بقالهم سنين ولاهتسبها  لناس جهلة مش فارقه معاهم غير ان حد ياخد بالو منهم و يضمنلهم امانهم و راحتهم و يتأكد ان احتياجتهم الاساسية متوفره؟


    انا حلّي وحتى لو كان ساذج ان كل واحد يبدأ بنفسه و بعدين عيلته و صحابه يحاول يتعلم و يبقى متحضر و من هنا ممكن نظرية"Snowball effect" تتطبق و حتى لو التأثير هيبان بعد سنين اهو يبقى اسمنا بدأنا و انشاء الله الدنيا مش هتفضل زي ماحنا عيشنها دلوقتي والله المعين.

    احب انهي رسالتي المره دي بجملة من أغنية "هيلا هوب" لوسط البلد بتقول "البلد دي ترابها اغلى مرها من الشهد احلى" :)

    فتكم بعافيه و اقابلكم بعد الأمتحانات بقى

    الاثنين، 10 يناير، 2011

    مقدمه

    انا زي ناس كثير, ناس عندها افكار و تساؤلات و نظريات عن ايه اللّي وصّلنا للاحنا فيه! شايفين حال بلدنا في النازل و نقول هنعمل آيه ادي الله وادي حكمته. وقفين مستسلمين لسنين من الجهل و الغباء! المهم يعني ان انا قررت اني احاول افهم  اساس المشكلة و لوعرفت ان اجد لها حلاً  و اشارك الناس باللي بيدور في دماغي عشان كده ال"blog"  اسمه "الحل ايه؟" , ربنا معانا جميعاً :) .

    بس الاول لازم ابدء بمقدمه بسيطه حفاظاً على التسلسل الطبيعي للكلام, انا من فترة و انا بتابع "blogs"  اصدقائي : "كريم حلمي و علي جميع". الحقيقة هي انّ انا بحب كتاباتهم بحس ان هما فعلاً موهوبين, "كريم" باسلوبه الساخر الملئ بالبداع. و من ناحية ثانية "علي" و خياله الواسع اللي يخدك من عالم يوديك لعالم ثاني متبقاش عايز ترجع.

    عمري مافكرت آني اكتب غير بعد اما قرأت"blog"ل "شريف حامد", كان بيتكلم عن موضة جديده و هي ان كل من هب و دب بيكتب! انا شخصياٌ مع الموضه دي,موضة اخيراً تخلي الناس تشارك بعض هي بتفكر في آيه. المهم اني دلوقتي ببص للموضوع انه مش مجرد موضه ولكن فرصه لكل واحد انه يعرف انه مميز عن الاخر بطريقته الخاصة. يعني انا مثلاً  لا اتوقع ان اكون في براعة اصدقائي و لكن القضيه هي اني محولش اكون زيهم و اني لازم اابحث عن ذاتي

     و التمس الى اهمية الكتابه و القراءة  و لضروريتهما في بناء مجتمع واعي مايضّحكش عليه. زي اما قال ممثل معرفهوش في فيلم مش فكره اسمه لعادل امام "سلاحي هو قلمي" او بما معناه يعني, الجمله دي في رأي حقيقيه  و يجب ان نبدأ نحارب بيه! يلا بيييييينااااااااااا

    انا مش بقول اني هعرف اكتب و لكن انا هكتب عشان افكر بصوت عالي, و تيجي زي اما تيجي لو حلو حلال عليّا و لو وحش ميخسرش :)